कितीही "प्रहार' झाले तरी मी अविचल!

""कितीही "प्रहार' झाले तरी मी अविचल आहे. शांतता आणि संयम हेच माझे धोरण आहे; तेच संस्कार माझ्यावर झाले आहेत. काही जण आक्रमक असतात, लोकांना ते आवडतेही; पण माझी पद्धत आयुर्वेदिक आहे "स्लो बट स्टेडी'...''
अशी जोरदार टोलेबाजी केलीय मुख्यमंत्री विलासराव देशमुख यांनी "साम मराठी'ला दिलेल्या विशेष मुलाखतीत.

मुरब्बी कॉंग्रेस नेत्याच्या प्रतिमेला जागत विलासराव देशमुख यांनी नारायण राणे यांचे नाव न घेता टोलेबाजी केली. पक्षश्रेष्ठी आणि पक्षावर निष्ठा ठेवली की यश मिळते, अशा शब्दांत सूचक सल्लाही दिला. राजू परुळेकर यांनी घेतलेली ही मुलाखत "साम'वरून सोमवारी (ता. 25) रात्री साडेनऊला प्रक्षेपित होणार आहे.

मुख्यमंत्री म्हणाले, ""पक्षश्रेष्ठी आणि पक्षावर मी कायम निष्ठा ठेवली. मिळेल ती जबाबदारी प्रामाणिकपणे पार पाडली, मग ती संघटनेतील असो वा सरकारच्या नेतृत्वाची. सामान्यांबद्दल कणव ठेवली. आघाडी सरकारचे नेतृत्व करताना डोक्‍यावर बर्फाचा खडा आणि जिभेवर खडीसाखर हे सूत्र कायम ठेवले, हीच माझ्या यशाची गुरुकिल्ली आहे.''

ते म्हणाले, ""कॉंग्रेस लोकशाही मानणारा पक्ष आहे. कोणी काहीही म्हणत असले, तरी पक्षश्रेष्ठींचा विश्‍वास असेपर्यंत काळजी नाही. नेतृत्व अस्थिर असल्याची चर्चा वारंवार झाली तर जनतेवर आणि नोकरशाहीवर प्रतिकूल परिणाम होतो. आता अस्थिरतेच्या चर्चा पूर्ण थांबल्या आहेत. कॉंग्रेस टिकली तरच आपले भले होईल, हे पक्षातील इतर लोकही लक्षात घेतील.''